Mtanzania ashinda mashindano ya kuonja vinywaji vya SABmiller

227
0
Share:
Rebecca Semoka

-Aongoza bara zima la Afrika

Mfanyakazi wa kampuni ya Bia Tanzania katika kiwanda cha Ilala kilichopo jijini Dar es Salaam Rebecca Semoka, ameshinda tuzo ya kuwa muonjaji bora wa bia kutoka barani Afrika, katika shindano la kuonja vinywaji lililoandaliwa na kampuni ya SABMiller na kushirikisha wafanyakazi wake wenye utaalamu wa kuonja vinywaji kutoka kwenye viwanda vyake vilivyopo sehemu mbalimbali duniani .

Rebecca ameweza kuwa  mwonjaji bora wa bia kutoka barani Afrika katika shindano hilo ambalo hufanyika kila mwaka chini ya usimamizi wa kampuni ya kimataifa AROXA inayoshughulika na usimamizi wa ubora wa bidhaa  zinazozalishwa viwandani. Mwaka huu shindano hili lilijumuisha washindani kutoka mabara ya Afrika, Ulaya, Asia, Latin America na Amerika ya Kaskazini.

rebecca 3

Rebecca akionyesha umakini katika kuonja bia kiwandani hapo.

Akiongea juu ya ushindi alioupata alisema kuwa unatokana na elimu yake, mafunzo na mazoezi mbalimbali ambayo amekuwa akiyapata  katika kampuni anayofanyia kazi ya TBL Group.

“Mimi taaluma yangu nimesomea  Sayansi ya Chakula na tekinolojia (Food Science &Technology) ambayo inajumuisha masuala ya  ubora wa vyakula na vinywaji kutoka chuo kikuu cha kilimo Sokoine.  Mafunzo mengi  Zaidi kuhusiana na ubora wa bia  niliyapata nikiwa kazini hivyo  kunifanya  kuwa  mtaalamu niliyebobea katika fani hii ya uonjaji wa bia”.Alisisitiza

Rebecca ambaye anafanya kazi kama mtaalamu wa ubora wa vinywaji katika kampuni ya TBL alisema kuwa jukumu lake kubwa ni kuhakikisha bidhaa zinazozalishwa zinakuwa bora na katika mazingira ya usafi ili kutoleta madhara kwa watumiaji wake ambao ni wateja.

rebeca 1

Rebecca Semoka akiwa ofisini kwenye Kiwanda cha TBL cha Ilala jijini Dar es Salaam.

Alisema uonjaji wa bia unafanyika katika viwanda vyote ili kujiridhisha kuwa bidhaa zinazoingia kwenye masoko ziko vizuri “Pamoja na kuwepo mashine za kupima ubora na makampuni ya kudhibiti viwango vya ubora wa bidhaa zetu bado tunahakikisha tunazionja kabla ya kutumiwa na wateja na uonjaji sio  wa ladha tu bali hata kuzinusa na kuziangalia kwa macho ili kuhakikisha ziko vizuri’, Alisema.

Rebecca alimalizia kwa kusema kuwa anajivunia ushindi huu kwake binafsi na mwajiri wake “Ushindi huu unadhihirisha kuwa watanzania tunaweza tukiamua na mfano Dhahiri wa jambo hili ni kwa jinsi viwanda vyetu vya Mwanza na Mbeya  vinavyoshikilia rekodi ya kuwa viwanda bora barani Afrika ambavyo vinavutia wageni kutoka kwenye hata nchi zilizoendelea kuja kujifunza jinsi vinavyoendesha kazi zake”, Alisema.

 

Share:

Leave a reply